Survista da las lavurs da la CDEP

Las lavurs currentas èn descrittas en il program d'activitads da la CDEP. Il program d'activitads actual concerna la perioda da program 2021–2024. Las directuras chantunalas ed ils directurs chantunals da l'educaziun publica han definì las suandantas finamiras surordinadas per quest program: contribuir a l'ulteriur svilup da la qualitad dal sistem da furmaziun svizzer, rinforzar la giustia da furmaziun, sustegnair la transfurmaziun digitala e promover la plurilinguitad sco er il barat e la mobilitad.

Il program d'activitads s'orientescha a las basas giuridicas ch'èn d'exequir.

Concordat da scola 1970

La basa giuridica per la collavuraziun dals chantuns en il sectur da furmaziun è dapi l’onn 1970 il concordat svizzer da scola.

Sin basa dal concordat da scola represchenta la CDEP ils interess dals chantuns envers la confederaziun, sa participescha a la collavuraziun internaziunala, elavura colliaziuns cun auters secturs politics (p.ex. migraziun, fatgs socials), presta support ed agid uffizial (p.ex. negoziaziun da tariffas da dretgs d’autur per scolas) e fa lavurs da project davart ils suandants temas:

• infurmaziun davart ils fatgs da furmaziun en Svizra
• monitoring da la furmaziun
• digitalisaziun
• instrucziun da linguas e barat
• scola obligatorica
• gimnasi
• scola media spezialisada
• furmaziun professiunala, cussegliaziun da professiun, da studi e da carriera
• sport
• cultura

Ulteriurs concordats dal sectur da la furmaziun

La CDEP exequescha ulteriurs concordats (cunvegnas interchantunalas):

• Cunvegna da diploms: La CDEP è responsabla per la renconuschientscha naziunala da diploms professiunals en il sectur da la scola (persunas d'instrucziun, professiuns da scola da la pedagogia speziala). Ella renconuscha ils diploms da las scolas medias spezialisadas. Ensemen cun la Confederaziun renconuscha ella ils diploms dals gimnasis.
• Cunvegnas da libra circulaziun: Tras l'execuziun da las cunvegnas interchantunalas da finanziaziun e da libra circulaziun garantescha la CDEP in access equivalent a las instituziuns da furmaziun en tut la Svizra e procura per la gulivaziun da las grevezzas tranter ils chantuns.
• Concordat HarmoS: La CDEP tira regularmain bilantscha davart il stadi da l'armonisaziun da valurs directivas impurtantas en il sectur da la scola obligatorica. Ed ella controllescha, quant enavant che las finamiras da furmaziun naziunalas èn vegnidas cuntanschidas.
• Concordat da stipendis: La CDEP sustegna ils chantuns tar l'ulteriura armonisaziun dals sistems chantunals da stipendis.
• Concordat da pedagogia speziala: La CDEP sustegna ils chantuns tar la realisaziun da la pedagogia speziala sin tut ils stgalims da furmaziun.
• Concordat da scola auta: La CDEP sa participescha a la regulaziun cumplessiva dal sectur da las scolas autas tras la Confederaziun ed ils chantuns.

 Infurmaziuns detagliadas chattais Vus sin la pagina d'internet tudestga e franzosa.